انتظار

إنتظار :

صبر , وسهـر

شوق , وشقا , ونفحة قهر .

إنتظار :

وتمضي الساعه على العاشق شهر .

وانت وينك ؟

أو متى يصحي حنينك ؟

كنت بالمسرح مشاهـد :

غايتك تجلس , تشاهـد :

كل مشهـد لا ظهـر ,

لكن إنك تجهل اللي يختفي خلف الستار !

ياما انتظرت , ولا وصل منك خبر .

وياما سهرت , ولا مر طيفك أو عـبر .

وياما صبرت , وملني حتى الصبر .

وشفتك أمس , وقلت لي : وش أنتظر ؟

وليه أنا واقف هنا.. وهناك ركزت النظر ؟

وكيف ما مليت جمر الإنتظار .. والجو حار ؟

واذكر إنك قلت يمكن :

عن قبالي : صاحبي تمنع ظروفه!

وعن وصالي : يمنعه ريبه وخوفه!

وإنه الغايب ولو شفته حضر!

ومشيت ما أعطيتك جواب ,

ولاشكرت حروف ترحيبك بعد طول الغياب !

واليوم جاوبت السؤال ,

بس بسؤال :

قلي وش معنى إنتحار ؟ . !

قلت :

معناها ( إنت / حار )

قلت لك : لا , لا , خطأ

ولأجل أسهلها عليك :

همست بإذنك همس ,

راجع سؤالك أمس !

قلت لي : وضح لي أكثر ,

قلت لك : حاضر , تبشٌر

إنتحار :

حاله تصيب إنسان ما عنده عزيمه

صارت الدنيا بوجهه ليل

ما فيها نهار!

شخص تايه

دون غايه

يطرد أسراب السراب ,

وكان أعمى قلب وعيونه تغشاها الضباب

وقلت لي : لا , لا تكمٌل

إنتحار :

هي كلمتين , وبإختصار :

شخص يشعر بالهزيمه : ما شعر بالإنتصار !

قلت لك : سهمك أصاب

لكن أصبر , قبل تفرح , وش أصاب ؟

معنى الإحساس بهزيمه :

حالة المهزوم قبل الإنسحاب !

وتدري ياخلي بلاش ,

لازم أنهي هالنقاش !

ودي أعطيك الإجابه ,

دام ما جبت الجواب !
ولازم تعرف الصواب .


بإختصار :

تدري وش معنى انتحار ؟

( شخص مل الإنتظار ) !

( شخص مل الإنتظار ) !

( شخص مل الإنتظار )